Løp i Eikefjord i 2026 – to løp for store og små
Det blir løp i Eikefjord også i 2026. Friidrettsgruppa i Eikefjord idrettslag planlegg minst to løpsarrangement gjennom året, og ambisjonen er å skape inkluderande og gode løpsopplevingar for både barn, mosjonistar og konkurranseløparar.
Hausten 2025 «restarta» vi Eikefjord løpskarusell med løp på Storebru. Det vart akkurat det løpet vi ønskte oss – med gode forhold, godt oppmøte og ei ramme der gjennomføring og løpsglede stod i sentrum. Erfaringane viste kor viktig det er å ha lokale løp der vi kan utfordre oss sjølve og kvarandre, utan at fokuset nødvendigvis ligg på å vinne.
Eikefjord halvmaraton – 9. mai 2026
Lørdag 8. mai inviterer vi til Eikefjord halvmaraton på Storebru. Arrangementet passar for alle nivå:
- Barneløp på om lag 1,5 km
- 5 km, 10 km og halvmaraton med tidtaking
- Trimklasse på 5 km og 10 km for dei som vil gå eller jogge utan tidtaking
Her ønskjer vi å leggje til rette for deltaking og meistring, uansett ambisjonsnivå.
Påmeldinga opnar snart – følg med på nettsidene våre for meir informasjon.
Eikefjordløpet – august 2026
I august arrangerer vi Eikefjordløpet, knytt til opninga av den nye gang- og sykkelvegen frå sentrum og ut til stadion. Endeleg dato er ikkje fastsett enno, men løpet vil bli arrangert i samband med skulestart.
Også her blir det barneløp, og det vil vere mogleg med tidtaking for dei som ønskjer det. Endeleg trasé blir fastsett når gang- og sykkelvegen er ferdigstilt, og vi satsar på å få løypa kontrollmålt.
Følg med for meir informasjon
Det kjem meir informasjon om løpa, påmelding og praktiske detaljar utover våren. Følg med på nettsida til Eikefjord idrettslag for oppdateringar.
Vi gler oss til å samle store og små til nye løpsopplevingar i Eikefjord i 2026.